11. nóvember sl. voru 175 ár liðin frá því sr. Matthías Jochumsson fæddist að Skógum í Þorskafirði. Að því tilefi var haldin minningarhátíð í húsi skáldsins, Sigurhæðum, og einnig í Ketilhúsinu um kvöldið.  Sr. Matthías kom víða við á lífsleiðinni; hann vígðist prestur að Móum á Kjalarnesi, en sat síðar á Odda á Rangárvöllum og Akureyri. Hann gaf einnig út landsmálablöð, en fyrst og fremst var hann skáld, að margra mati einn af fáum andans mönnum þjóðarinnar, sem vert er að kalla "þjóðskáld". En hann var líka mikill tónlistarunnandi; börnin hans lærðu á hljóðfæri, dætur hans fóru til dæmis i söng- og tónlistarnám til Kaupmannahafnar í byrjun síðustu aldar, sem var fátítt á þeim árum. Þær kenndu síðan á píanó og fleiri hljóðfæri heimkomnar og það er mikil tónlist í ættinni, t.d. eru söngfuglarnir Þórunn, Ingibjörg og Dísella Lárusdætur lang- langafabörn Matthíasar.