Fimmtudagskvöldið 14. október kl. 20:00 verða tónleikar í Hömrum þar sem flutt verða ljóðalög Jóns Hlöðvers Áskelssonar.  Flytjendur eru Margrét Bóasdóttir sópran  og Daníel Þorsteinsson píanóleikari en auk þeirra mun Þráinn Karlsson leikari lesa hvert og eitt ljóð áður en það verður flutt.  Þessi sönglög Jóns Hlöðvers eru afar fjölbreytileg, litrík og krefjandi í meðförum en hann hefur ávallt lagt mikla rækt við samningu söngverka bæði fyrir kóra sem og einsöngvara.  Þess má geta að um þessar mundir eru 40 ár liðin frá því að Jón Hlöðver hóf störf við Tónlistarskólann á Akureyri og hefur hann ætíð stutt starfsemi skólans með ráðum og dáð.